Richard Cely jnr. to George Cely

77

Rychard Cely the younger

Anno Jhesu M^liiij^ciiij^xxij

     Riught whell belovyd brother I recomende me unto yow as
lowyngly as I con or may informyng yow that the xxviij day of
Marche I ressawyd a letter frome yow whryt at Calles the Twysday
after howr departtyng qwher by I ondyrstonde ze be howyr in
safette thankyd be God and ze fynde aull thynges acordyng to
yowr intent and as for Thomas Kesten ys letter ys delyvyrd and
as for all thynges in Essex I schawll do for yow as I do
for my nowyn Syr I wndyrstonde be Wylliam Celys letter
that aull owr Cottes wholl ys sowlde in Calles hyt ys goode
tydynges I pray God sende ws sum sall of howr fellez I hawhe
beyn at Abynton syn I whrat my laste letter and spake w^t Wylliam
Bretten and he myte go no fardar w^t me for packyng of Lombardes
wholl at Hamton the qwheche muste departe into Gean^a at thys
Ester in the Kynges schypys and he has promysyd to met w^t me at
Norlache^b on Low Sonday Syr I pray yow sende me a letter
schorttely how I schawll be demenyd in anssor to Wylliam Myd-
wyntter of hys fellys for and ze make any salle hyt wylbe whysdom
to be sewyr of mo heyr ys Wylliam Dawlton now and I thynke heff
he hawhe any wente at Calles hyt wyll cawse hym do the lese w^t
yow. Syr heyr has beyn John Croke of the Tempyll w^t howr
mother and informyd her that he hard the exchetter of Essex say
that he moste go into Essex to sit in an enqwery of howr londys
qwhether howre father dyed sesyd in hys lond or qwhethyr whe be
of lawfull ayge and of home howrlonde ys howlldyn and zestyrday
I whente to master Molenars and bare w^t me the laste made deyde
of Brettes and yowr laste madedys of L. Malyns^a and whe schewyd
hym that the londe stode in fefes handes and hyt whos informyd
hym that Malyns whos holdyn of the Kyng and aull londe howldyn
of the Kyng schulde be exchettyd for the Kyng tyll the hayre has
made hys fyne w^t the Kyng byt whe hafe no londe that holldes of
the Kynge be the awyse of master Molenars I gawhe the exchetter
xl^s for ws bothe and so whe be thorow w^t hym for aull matters and
parellys byt I mowste brynge hym at laysar a byll of the day a
the dysses of owr fathe owr ayge and of home owr londe ys howldyn
at he may set hyt in the Kynges bokys and on the xxvij day whos
Byfelde berryd and on the morow herby hys whyfe toke the mantell
and the rynge and at aftyrnoyn the same day whos the grehyt
new gone of brasse shott at Mylezeynde^b at whos mad in the Towyr
and hyt brasse awll to pessys Syr I hawhe lettyrs fromy lorde wryte
in Napwlles byt I red them not zeyt whane I se them I schawll
whryte to yow of syche thynges as ys in them be the grasse of Jhesu
ho kepe yow. Wrytte at London the xxix day of Marche.

                                                             per yowr brother

                                                                              Rychard Cely.

     Addressed: A my whell belovyd brother George
                             Cely marchand of the stapell
                             beyng at Callez so thys dd.

^a Genoa.                               ^b Northleach.

     ^a Perhaps this is Little Molands, in South Ockendon, near Alveley, part of the
Manor of Groves, held of the Honour of Tutbury, which was itself part of the
Duchy of Lancaster. It might be argued that it was not held of the King, that is,
of the Crown, though the King held the Duchy of Lancaster. Bretts was, at the
death of the younger Richard, held of the Lady de Inglesthorpe.

     ^b Mile End.