George Cely to Richard Cely snr., his father, merchant of the Calais staple

6

Jhesu M^liiij^clxxviij

     Ryght whorshypffull Fadyr aftyr all dew recomendassyon pre-
tendyng I recomewnd me unto yow in the most lowliest whisse that
I con or may Fordyr mor plesyth yt yow to undyrstonde y resseywyd
an lettyr from yow wrytt at London the forst day of May the
wheche lettyr I hawe rede and do whell undyrstonde I felle be yowre
sayd lettyr ytt ys conclewdyd w^t the Kyng and hys counsell that
whe shall pay the soudyar starlyng mony whe wher at losse ynowe
affore thow ytt be no mor mony ys styll at Calles ij^s ij^d lowar^a than
ytt ys in Flaundyrsse and now starleng mony to that ytt ys to
grett an losse whe most soffyr ytt whe may nott chesse me semyth
yff ytt coud be browght anbowght that whe myght hawe an quyne^b
at Callez agen and let non hoder mony go in the town of Calles
but starlyng mony than showld whe make bettyr shyfft and ytt
showld nott torne us to so grett losse for now as the casse stondythe
at thys tyme ther ys no merchant that spende an grott in the towne
of Calles but they lesse an halpeny and men of the stapell breng
the mony to Calles that ys browght ze may se what losse ys in
grett somys but yff the mayer and the fellyschyp seke an remedy
herfor ytt wyll be for the fellyschyp to grett an losse &c. Plesyth
ytt yow to whett y felle by yowr wryttyng the schyp at London
and ze wold shyp and ze myght hawe any comefortt in good fayth
ytt wher whell done that ze sheppyd also ze shall stonde in as good
casse as any hothyr men & whan ytt ys at Calles the venter ys
borne I thanke God ze hawe growyn at Calles to answer the costes
& chargys of the same and hovyr and above that I trost to God to
make yow hovyr at thys marte c^li ster: and mor and I may be
whell payd as my hoppe ys y shall be in any whysse lett yowr felles
come thys next sheppyng and yowr xix sarplers and a poke and
aftyr yff God send fayr whedyr and good tydynges ze may dayly
send mor &c. I woll be the grace of God unto thys syngsyon
martte and ther I woll speke w^t John Vandyrhay and seche mer-
chantes as I am acostomed to delle w^t y moste do as hothyr men dothe
ar elles y most kepe stylle y undyrstode by John Daltonys wryttyng
at London whan ytt come to me ther that he myght an sowlde all
yowr wolle halfe in honde the tothyr halfe at Whyttsontyde ytt
whas no mor but all your howlde woll and as for the newe ytt ys
the iij^d peny vj monthys and vjmon thys and so myght I a done syn
I come unto Calles the day ys long y woll knowe hym ryght whell
that shall hawe any at that day y shall se at the marte what y may
do yff I can do none bettyr I most do as hothyr men dothe &c whe
have chossyn Robard Tate to be howyr leffetennawnt and he most
be at Calles w^t in thys monyth no mor unto you at thys tyme but
Jhesu have you and all yowrs in hys blessyd kepyng Amen wrytt
at Calles the viij^th day of May lxxviij

                                                                              per yowr son

                                                                                                 G. Cely.

     Addressed: Unto my ryght whorshypfull Fadyr
                               Rychard Cely merchant of the
                               Stapell off Calles Dewellyng at
                               London yn Martte Lane so it come.

     ^a Written over ‘hyar in an,’ crossed out.     ^b Cunagium, mint. Our coinage.